پر اسرار طلسمی چیز ؛گیدڑ سنگھی ؛ حقیقت یا افسانہ

October 2017 کو ترمیم کیا میں یہ لفظ کہاں سے آیا؟

گیدڑ سنگھی (جیکال ہارن) کا لفظ تو ہم اکثر سنتے رہتے ہیں ،لیکن یہ لفظ اردو لغت مین موجود نہیں ہے اور دلچسپ بات یہ ہے کہ گیدڑ کے سینگ تو ہوتے ہی نہیں ہین۔
پھر گیدڑ سنگھی کس بلا کا نام ہے اور یہ لفظ کیسے بنا اس کے ماخذ کیا ہین ؟
روایت ملتی ہے کہ بعض مخصوص گیدڑوں کے سر پر ایک چھوٹا سا سینگ نمودار ہوتا ہےاور یہ طلسم کی حیثیت رکھتا ہےاور عام طور پر جادو ٹونے اور عملیات کا دھندہ کرنے والوں کے پاس ہوتا ہے۔ اور یہ خیال کیا جاتا ہے کہ جس کو یہ مل جائے اس پر دولت کی بارش ہوتی ہے اور اس کی تقدیر بدل جاتی ہے ۔یہ الگ بات ہے کہ جو اس بیچتے ہیں وہ گلیوں میں بھیک مانگتے پھرتے ہیں۔
اس سینگ میں ایسا کیا راز پنہان ہے کہ لوگ اسے حاصل کرنے کے لیے جوگیون کو منہ مانگی رقم دینے کو تیار ہو جاتے ہیں۔ کیا یہ توہم پرستی اور ضعیف الاعتقادی ہے یا واقعی یہ طلسمی چیز ہے جس میں بے شمار مخفی فوائد موجود ہیں۔

تبصرے

  • اقبال صاحب، واقعی یہ سینگ تو بڑا دلچسپ ڈھونڈ کر لائے ہیں آپ۔ لیکن میرے خیال سے اس کا معاملہ بھی ایک اور مشہور جانور کے سر کے سینگوں کی طرح ہے۔ (اشارہ: یہ جانور طبیعت کے استقلال اور جفا کشی کے لیے معروف ہے)۔

    میرے ایک عزیز کے پاس ایک ڈبیا میں ایک چیز موجود ہے جو بقول ان کے گیدڑ سنگھی ہے۔ اسے انھوں نے سیندور میں سینت کر رکھا ہوا ہے اور دعویٰ کرتے ہیں کہ اس کے بال بڑھتے چلے جا رہے ہیں۔ یہ الگ بات کہ جب سے یہ ان کے پاس آئی ہے، بیچاروں کا ستارہ زوال کی طرف مائل ہے۔

    البتہ آپ کی ایک بات سے معذرت کے ساتھ اختلاف کی جسارت کروں گا کہ یہ لفظ لغات میں موجود نہیں ہے۔ ملاحظہ ہو:
    https://ur.oxforddictionaries.com/ترجمہ_کریں/اردو-انگریزی/گیدڑ_سنگھی
    نوٹ: اگر اس پر کسی کو ابنِ انشا کا شاہکار ’استاد مرحوم‘ یاد آئے تو میرا ذمہ نہیں ہے۔
    گیدڑ سنگھی کے بارے میں ایک (نیم) معلوماتی مضمون یہاں پڑھا جا سکتا ہے:
    https://daleel.pk/2017/05/04/41239

  • ظفر صاحب، ہو سکتا ہے اس کے سینگوں کے ساتھ بھی وہی معاملہ ہوا ہو۔اُس بیچارے کے تو دوبارہ آج تک سینگ نظر نہیں آئےاور اِس کے بھی نظر نہیں آئیں گے،یقینا اس کا واسطہ بھی حضرتِ انسان سے ہی پڑا ہو گا۔
    آپ نے جو لنک بھیجا ہے اُس میں لکھا ہے کہ یہ سینگ ہوتے ہی نہین بلکہ یہ گیدڑ کے سر کی ایک بیماری ہے۔یہ دراصل ایک ٹیومر ہوتا جو اس کے سر پر نکلتا ہے اور یہ سر سے الگ ہونے کے بعد اس ٹیومر میں موجود بیکٹریا ایک دوسرے کو کھانے کی وجہ سے بڑھتا رہتا ہے ،جس سے محسوس ہوتا ہے کہ گیدڑ سنگھی بڑھ رہی ہے۔
    دوسری بات یہ ہے۔میں نے اپنی پوسٹ میں لکھا تھا کہ یہ لفط کسی اردو لغت میں نہیں ہے کیونکہ میرے سامنے جو آٹھ دس اردو لغت پڑے ہیں اُن مین مجھے یہ لفظ گیدڑ سنگھی نہیں ملا۔بلکہ اردو لغت تاریخی اصول پر ، میں بھی نہیں ہے۔ایسا کیوں ہے ؟ آپ بہتر بتا سکتے ہیں ۔

  • اس کوتاہی کی کوئی وجہ سمجھ میں نہیں آتی، خاص طور پر اس لحاظ سے کہ گیدڑ سنگھی کوئی ایسا نیا لفظ بھی نہیں کہ لغات والوں کو اس کی ہوا نہ لگی ہو۔

    لیکن لغتِ کبیر میں یہ اصطلاح موجود ہے، البتہ کسی اور جگہ پر

    http://udb.gov.pk/result_details.php?word=111456

  • لفظ شاید گدڑسنگھی ہے

  • گدڑسنگھی نہ تو پراسرار ہے اور نہ ہی طلسمی ہے۔ ہندوپاکستان میں پائے جانے والی جوگی قبائل میں ناگ راج کے بعد دو چیزوں کو بہت اہمیت حاصل ہے پہلی چیز ہے گدڑسنگھی اور دوسری چیز ہے سانپ کا منکا۔ جوگی اپنی لڑکیوں کو جہیز میں یہ دونوں چیزیں لازمی طور پر دیتے ہیں۔ان کے بغیر ان کا جہیز مکمل نہیں ہوتا۔ گدڑسنگھی سے دولت اور یقدیر وابستہ ہوتے تو ہر جوگی کا شمار امرا میں ہوتا۔ اصل میں یہ گیدڑسنگھی جوگیوں کے ہاں کامیاب شادی کا ٹوٹکہ ہے، اس سے امید کی جاتی ہے کہ لڑکی کی شادی شدہ زندگی سکھ میں گزرے گی۔گدڑ سنگھی اس دور کی یادگار ہے جب معمولی سی انوکھی اور کمیاب چیزیں بھی سرمائے میں شمار کی جاتی تھیں۔ ایک دور میں کوڑیاں یا سمندری سیپیاں کرنسی کے طور پر استعمال ہوتی تھیں وجہ ان کا کمیاب ہونا تھی۔ کوڑیوں کے مول آج بھی ہمارے محاورے میں استعمال ہوتا ہے۔

  • شاہد بھائی ہندی میں اسے سیار سنگھی کہتے ہیں، سیار بمعی گیدڑ۔ لغتِ کبیر میں بھی سیار سینگی کے نام سے اندراج ہے۔

  • شکریہ ظفر صاحب ،لغت کبیر میں سیار سینگی جامع اللغات سے ماخوذ بتایا ہے،
    یہ جامع اللغات عبدالمجید کی ہے یا کوئی اور ہے۔
    کیا کوئی سنسکرت اردو لغت آن لائن موجود ہے ؟

  • جوگی گدڑ سنگھی ہی کہتے ہیں ، سیار سنگھی کبھی رائج دیکھا نہ سنا۔

  • اقبال صاحب، ایک سنسکرت اردو ڈکشنری ہے تو سہی لیکن افسوس کہ وہ صحیح طریقے سے کام نہیں کر رہی۔

    ملنے کا پتہ یہ ہے

    https://ur.glosbe.com/sa/ur

    البتہ مقتدرہ قومی زبان نے ایک اسی قسم کی لغت چھاپ رکھی ہے۔

سائن ان یا رجسٹر تبصرہ کرنے کے لئے۔