بن مانس، بھلا مانس، صوفی منش

November 2016 کو ترمیم کیا میں یہ لفظ کہاں سے آیا؟

یہ الفاظ اردو میں عام استعمال ہوتے ہیں، لیکن کبھی آپ نے غور کیا ہے کہ مانس کا مطلب کیا ہے؟
مانس ہندیورپی خاندان کا قدیم لفظ ہے۔ یہی لفظ سنسکرت میں دو معنی دیتا ہے، ایک انسان اور دوسرا ذہن۔ انسان ہی سے متعلق ایک اور لفظ مانو ہے، جو سنسکرت میں باوا آدم کے معنی دیتا ہے، یعنی تمام انسانوں کو جنم دینے والا۔

چونکہ یہ لفظ قدیم ہے اس لیے یورپی زبانوں میں بھی جگہ جگہ پایا جاتا ہے۔ سب سے پہلے تو سیدھے سیدھے انگریزی کا ’مین‘ ہے جو قدیم جرمینک سے مستعار ہے۔ جرمن میں بھی مان ہے، جس کے آخر میں ڈبل این لگا دیا جاتا ہے۔ اسی طرح لاطینی کا ہومو یا ہومن بھی پروٹو انڈو یورپین زبان کے اسی مادے سے نکلے ہیں۔ چنانچہ انسان کا سائنسی نام ہومو سیپیئنز ہے، یعنی ذہین انسان۔

دوسری جانب انگریزی لفظ مائنڈ ہے، جو ایک بار پھر مین سے ماخوذ ہے۔ کیوں؟ اس لیے کہ انسان ہی کو ذہن اور سوچ والی ہستی سمجھا جاتا تھا۔

بات یہیں پر ہی ختم نہیں ہوتی بلکہ فارسی کا لفظ منش بھی ذہن، دماغ، فطرت، طبیعت وغیرہ کے معنی میں استعمال کیا جاتا ہے۔ منش قدیم فارسی کے لفظ مانس سے ماخوذ ہے، جو انسان کے معنی دیتا تھا۔

دلچسپ بات یہ ہے کہ پنجابی اور ہندکو زبانوں کے بعض لہجوں میں خاوند کو مُڑنس کہتے ہیں، اس کا ناطہ بھی مانس سے واضح ہے۔

اس طرح ایک ہی لفظ انگریزی، لاطینی، سنسکرت، اور فارسی کو آپس میں ملا دیتا ہے، جس سے ایک بات واضح ہو جاتی ہے کہ یہ سب زبانیں ہندویورپی خاندان سے تعلق رکھتی ہیں

تبصرے

  • پشتون بچیوں کے نام "زرمینہ"، "گل مینہ" (اصل میں یاے مجہول سے، مگر غلط العوام میں یاے معروف، میم بالکسرہ) وغیرہ بھی اسی "مین" کے مادہ سے مشتق ہیں جو "ذہن" کے معنی دیتا ہے. جس سے انگریزی میں "مینٹل"، "مائنڈ" وغیرہ نکلے ہیں. دوسری جانب، پشتو میں انسانوں کی قیام گاہ (گھر، بستی) کے لئے بھی "مینہ" (یاے مجہول) مستعمل ہے. البتہ پشتو میں "مینہ" (یاے معروف، میم بالکسرہ) کے معنی محبت، پیار، عشق وغیرہ ہیں. شاید اس کا تعلق کسی دور میں ذہن و دل کو ایک ہی سمجھنے سے رہا ہو.

  • قاضی صاحب، بہت عمدہ سمت نمائی کی ہے آپ ہے۔ اس سے مجھے پشتو کا ایک اور لفظ میرمن یاد آ گیا، جسے رومن میں یوں لکھا جائے گا

    mer-man

    اس کا مطلب ویسے تو عورت/بیوی ہے، لیکن اس کا رشتہ من اور مین سے واضح ہے۔

  • سیندھی زبان میں لفظ ماڑھوں بمعنی لوگ مروج ہے کیا اسے بھی مانس کے قبیلے کا سمجھا جائے

  • جی اصغر صاحب، یہ اسی قبیل کا لفظ معلوم ہوتا ہے۔

  • جسے ہندکو میں مُڑنس کہتے ہیں اس کو سندھی میں مُڑس کہتے ہیں یہ بھی مانس سے ہی نکلا ہوا ہے شائد

  • جی مرشد، بظاہر تو اس ندی کے ڈانڈے بھی اسی قدیم چشمے سے جا ملتے ہیں۔

  • ایک گلگتی دوست نے بتایا بیٹی کو ان کی زبان میں دِھی کہتے ہیں سندھ میں بھی بیٹی کو دِھی کہا جاتا ہے، لگتا ہے زبان دریائے سندھ کے ساتھ ساتھ سفر کر رہی ہے۔

  • March 2017 کو ترمیم کیا

    ایک گلگتی دوست نے بتایا بیٹی کو ان کی زبان میں دِھی کہتے ہیں سندھ میں بھی بیٹی کو دِھی کہا جاتا ہے، لگتا ہے زبان دریائے سندھ کے ساتھ ساتھ شمال سے جنوب کی جانب سفر کر رہی ہے۔۔

  • جناب شاہد خان صاحب السلام و علیکم! ہمارے ہاں سرائیکی زبان میں بھی بیتی کو "دھی "کہا جا تا ہے

  • وعلیکم سلام سئیں عباسی صاحب

سائن ان یا رجسٹر تبصرہ کرنے کے لئے۔